HRUAITU TI MI IH SULLAM -

By/ Pastor Thawng

Articles

HRUAITU TI MI IH SULLAM
By/ Pastor Thawng
1. Gen. Montgomery in, “Hruaitu cu thil ttha tuah dingah hmuitin mi lam ih a fehpi thei tu le
mi ih zumtlak in a nung tu asi,” ati.
2. Oswald Sanders in, “midang kha amai duhnak lam ih hruai thei tu, thilttha tuahnak ah mi
neh thei tu asi,” ati.
3. Admiral Nimitz in, “hruaitu cu a hruaimipawl ih zumtlak le upattlak in a um ih mipi kha
hmuitin mi ah a thlen pi thei tu asi,” ati.
4. American President (33) nak Truman in, “midang lungfiang ko in a sim thei ih a sim vekin
a tuahtu asi,” ati.
5. Jeferry John cun, “midang ih thiltitheinak hman hna a thiamtu asi,” ati.
6. Dr. Gains Dobbins cun hruaitu thu hi phun (5) in a sim fiang: cupawl cu
a. Thiltitheinak laksawng a nei ding.
b. Simrel thei nak le thuneinak a nei ding.
c. Thil an tuah tikah midang hnakin fel deuh le ttha deuh in a tuah thei ding.
d. Midang ih zohtthimtlak asi ding.
e. Midang ih an thuhlun le thlun thei ding in a sim thei tu le midang hnakin huham a nei
mi asi ding,” ati.
7. Peter G. Wiwcharuck cun phun (2) in a sim
a. “Hruaitu timi cu mipipawl hmang ih thilti hlawhtlin thiamtu asi,” ati.
b. Hruaitu timi cu mipi, can, zumnak, suangtuahnak, hruaitu dinhmun le thildangdang
theithiam zet ih lawrkhawm ih thilti pitlin hi asi,” ati.
8. Harry S. Truman cun, “hruaitu timi cu mipi ih duh lemlo mi a va si khal le a tthami asi
ahcun duh thei ding in tawlrel thiam, duh ter sal thiam tu asi,” ati.

HRUAITU IH KAN THEIHPALH TTHEU MI
1. Hruaitu timi hi dinhmun/sinak (position) asilo.
Sinak le dinhmun ah ruah sual ruangah ahnuailam vekin buainak a um ttheu:
a. GS, Chairman, President, Director, Secretary, Leader a cuh in kan cuh aw ih phun le
hnam tiang zoihnitaw in hrilawknak tla kan tuah ttheu, curuangah duhlo nacing in
Kawhhran le pawlkom tthenawknak a um ttheu.
b. Mipi, ttuanpi le midang parah le hmuntinkim ah Boss le Uktu si an tum ih veto ana an
hmang duh ruangah thuronpek theih lo, tititlang ngah lo nak ruangah pawlkom
tthenawknak ah acang ttheu, tthenawk lo hmansehla lungrual lo nak, thinlung
hmuawklonak in kawhhran damlonak a cang ttheu.
2. Hruaitu timi hi Bulpak ih felnak men hi asilo
a. Mi hruai thiamnak timi cu Thlarau laksawng pakhat asi ruangah mi felzet
hmuahhmuah in hruaitu ttha an tling thluh kher lo.
b. Felzet si mipi hruai thei lo, fello zet si mipi hruai thei emem an um ttheu.
c. Bulpak felnak hi mipi in sor ban asilo ahcun hruaitu ah a tling lo tinak asi.
3. Hruaitu timi cu Bulpak Thiamnak asilo
a. Hruaitu sihi Thlarau laksawng pakhat asi ruangah mi thiam pohpoh in mi hruai an
thiam thluh lo ih thiamnak nei lo hman sehla piangpi BA le thlarau laksawng a co nak
in mi hruai thiam ngaingai an um ttheu. Eg: Dungthlutu)
b. Zirnak, Thiamnak nei, Mirang ca le ttong thiam le mi neinung si ruang khalah hruaitu
an tling thluh cuang lo.
4. Lalnak le Thuneihnak asilo
a. Jesuh cun Lalnak le Thuneihnak in ttuanpi le mipi a hruai dah lo ih nunnem
dangtornak le zangfah zawnruahnak thinlung in mi a hruai ttheu
b. A dungthluntu pawl ih ke tla a kholh sak ih harsa rilrawng bawm ttulmi pawl a bawm
ringring.
HRUAITU LUNGPUT (Phil. 2:5)
01.Tuukhal thinlung (Jn. 10:11; Ps. 23:1-6)
02.Raltthatnak (2Tim. 1:7)
03.Ngaithiamnak (Col. 3:13-14)
04.Tangdornak (1Pet. 5:5-6; Prov. 15:33)
05.Duhdawtnak (Jn. 13:35; 1Cor. 13:1-3, 13;
06.Thinsaunak (Prov. 15:18; 19:2; 25:15
07.Thutaksinak (Jn. 4:24; 8:32; Jas. 3:14)
08.Dingnak (Prov. 14:34)
09.Mi zawnruahnak (Lk. 9:23; Col.3:12; heb. 10:24;
10.Thungainak (Rom. 5:19; 1Sam. 15:22; Prov. 1:33; 21:3).
11.Midang hrang nunnak tiang pek siang nak (Jn.15:13
HRUAITU IH HNATTUAN
1. Hruaitu cun a hruaimi a tthanso pi ding ih hmailam a pang pi tengteng ding.
2. Hruaitu cun a hruai mi a tlakniam pi in buainak a suah ter hrimhrim lo ding.
Kum (12) sungah kan Kawhhran tthanso le Tlakniam thu thlir sal nak
a. Tthansonak : Pastor kan nei
: Member 351 tiang kan pum
: Biakinn nei thei dinhmun kan si
: Australia level in Degree ngah (2) kan nei
b. Tlakniamnak : Pathian kan hai nawn lo vivo
: Pathian thu kan duh nawn lo
: Thlarau hlo lainatnak kan nei nawn lo
: Mino Biakinn an thleng nawn lo
: Thlarau mit kan men nawn lo
: Mission hnattuan kan tlaksia
3. Hruaitu cun a hnattuan le thilti ding mi a ruah cia ding
a. Kawhhran tthanso dan ding lamzin phunphun
b. Meeting can ah agenda thawh ding le thil fehpi dan
c. Excursion, Picnic, retreat le thildang tuah can ah thilttul poimawh hrang
4. Hruaitu cun a hmun, a tikcu, le a santiluan zirin mipi hruai in hna attuan thiam ding
a. Ahmun thu ah: atu kannih hi kawlram ah kan um nawn lo ih Australia ah kan um zo,
cun kan kawhhran cio suah san in ALCC ah unau bangin kan um tlang zo vekin
kaihruaiawknak thuah kan kawhhran a dam thei nak dingah Pathian thu si lemlo mi
milai ih tuahcopmi daan le dun, le zumnak lam le kaihruaiawknak thuah napi in ralring
attul (Mark. 7:6-8; Matt. 15:9).
b. Atikcu thuah: thusim (mipi thinlung khar hnu sim rero khal um zia a nei lo), khawm le
khawmhruai (Hmaisabik din can ah khawm hruaitu in sermon ciamco tla khi um zia a
nei lo), thlacam can (Khawm sung rei tuk thlacam) ti bang pawl tla hi atikcu zirin
hmang thiam a thupi tuk, Pathian le thlarau thu asi ti ih duhduh in hmang a ngah lo
ziangahtile atikcu in hnattuan, ei le in le it pawl tla attul ttheu ruangah.
Cun atikcu zirin hnipuan hruk thiam (khawm, puai, Hnattuan, it, leng, inn, tlawngkai),
khal hi a thupi tuk, ziangah tile hnipuan hi kanmai hrangah kan lei nan midang
hrangah kan hruk ti hi thei attha, culo le miaa hlawhnak le ning awk nak a cang thei.
c. Asantiluan thuah: Khawm hlasak thuah Hymn Song kan uar vekin Praise and worship
hla khal hi ning ding asilo, ttingttang kan uar vekin Music dang khal hi ning ding asilo,
kawlram ih kan khawm dan pawl uar ding a um ih api amawi rualrual in tu san ih
Pathian biakkhawm dan khal zir thiam vivo a ttha. Asantiluan zirin mino duhdan tla hi
thlun le theithiam tla hi a thupi tuk ve ziangahtile mino biakinn thleng le thleng lo cu
hivek thil parah tampi a tthum aw ih ahngat aw.
5. Hruaitu cun duhdawtnak le Thlarau mi sinak, thutak le thlarau lam hoi in mipi hruai thiam
tu asi ding.
6. Hruaitu cun tthansonak dik le mipi damnak a somso vivo ding.
Tthansonak dik le dam kan thei thiamnak dingah tthansonak dik lo pawl kan langter ding
a. Member kan tam, kan pum zat in peknak dang le tthenhra tthenkhat pum cuanglo
b. Hruaitu kan tam zat in tthansonak um lo
c. Biakinn ttha le Music ttha le thiam kan nei zat in khawm nuam lo
d. Mifel mittha, mifim mithiam kan tam zat in kawhhran sung phurrit kan sawng awk thei
lo
e. Mino le nauhak kan tam vekin hmailam thil thuah ruahsannak le hngamnak um lo.
f. Kawhhran khat ah unau bangin kan khawm awk tlang nan unau thinlung nei thei lo
nelawknak le thinlung hmuh awk nak um thei lo
g. Pastor le upa tthattha kan nei ko nan lungawi tawk lo, rinsan duh lo phunzai ringring
h. Kawwhran member pawl in ttuannak, pekawknak le peknak aiah bawmaw, pekawk
duhlo le ngah lam akhuihazee lawng kan buaipi
7. Hruaitu cun mipi hruaitu kan si vekin kan hmurka, ei le in, nun zia le hnipuan ralring in a
fimkhur ding. (James. 3:1-11).
8. Hruaitu cun kawhhran tthansonak le hlawhtlinnak hrangah mipi pawl kha an umnak ding
hmun cio ah felte in ret thiam in an thiamcaknak kha hmang thiam a zuam ding, attul dan
zirin lenglam mi tiang hmang thiam cu hlawhtlinnak tthabik a si.
9. Hruaitu cun a sinak, a hnattuan le mah ih tithei cin tawk theithiam aw in attul dan zirin
cangvaih thiam in mi rinsan hna a thiam ding.

HRUAITU HLAWHTLINNAK
1. Mah le mah sinak, dinhmun le hlawhsamnak theithiamawknak
2. Hruaimi pawl ih dinhmun le sinak khal theithiamnak
3. Dingfelnak thianghlimnak uar ih a tak in nunpinak
4. Kaa lawng in mi hoha lo in nun le ttuansuahnak in mipi hruai nak
5. Mai zawn lawng ruat lo in midang zawnruah thiam nak
6. Buainak le harnak pumpelhtu silo in pahtlang thei nak
7. Ngol eltau, phirsit lo le dungsip lo ten ttuan ngerngo nak

HRUAITU LE A SINAK
1. Mi piangthar asi ding. Ziangahtile
a. Piangtharnak hi hruaitu pitling sinak ding ah a hrampi bik asi
(innpi pakhat ah thildang hmuahhmuah ai ah a foundation a thupi bik bangin)
b. A khalhmi tuupawl nunnak, hlimno, tidai le rawl ttha umnak lam hruai attul ruangah
c. Kawhhran hruaitu si cu thlarau hnatuan asi ih, van kan thleng tikah laksawng ngah
ding in Pathian theipi mi hnattuantu ttha si attul ruangah (piangthar lo volunteer).
2. Pathian hna hrang ah kawhnak a co mi asi ding
a. Kawhhran hruaitu, Ram uktu, sizung sikhan hnattuan, tlawng saya/sayamah, le
innsang nu le pa kan zate minung hmangin Pathian hril mi hruaitu kan si cio
b. Cun zumtu nun cu midang hrang ih nun asi vekin a ziangti kong zawng tal cun hruaitu
kan si ttheh
c. Cutin Pathian in in kawh tikah in kawhnak san cu midang hrangah nung ding ah le
bawmtu ttha si ding ah kawh mi kan si
Asinan dinhmun hleice le poimawh deuh hrang ih Pathian kawhmi cu an um ih cumi cu mi
zaraan in ttuan ci lo le iksiik ci lo mi hruaitu dinhmun asi.
Cu mi pawl cu Eph. 4:11 sung kan hmuh vekin: Tirthlah, Prophet, Evangelist, Pastor le zirhtu
pawl an si. Hi mi pa (5) pawl cu kan kut zung pa (5) pawl thawn an hnattuan dan an bang aw.
Tirthlah cu Zungpi vek asi, Prophet cu kawk zung vek asi. Evangelist cu zung lai vek asi. Pastor
cu sui zung vek asi ih Zirhtu cu zung te bik vek asi.
Hi vek hnattuan tu dingah Pathian kawhnak a cotu pawl le hriakthihmi pawl cu anmah thu, an
duhhrilnak men in an cawl in an suahsan thei mai lo,
Mimal le mipi thu, duhlonak men in dodal ding, hrem ding, hmuhsuam ding cawlter le banter
ngam rual khal an silo
Asan cu Pathian cu thikthusia Pathian asi ih Nu le Pa in kan fa le an sual an palh tikah ahrintu
kanmah in nunsim, kawk le vuak cu kan duh ih poi kan ti lo nan midang zokhal in nunsim, kawk
vuak le dai cu kan siang lo cuvekin kan Pathian in a mi le a hriakthih mi pawl cu an sual an palh
can hmanah midang in dai cu a duh hrimhrim lo
Eg;
Abraham le Pharo
Moses le a unau pawl le Korah le Dathan party pawl
Joseph le a uanu pawl le thawng tlak pi le ttuan pi pawl
Daniel le a hnattuanpi pawl
Jerimiah le ram uktu pawl
Elisha le nauhak 42 pawl
Pathian mi le Siangpahrang
Pathian hnattuantu pawl
Hruaitu um lo in mipi a um thei lo ih mipi um lo in hruaitu tla um zia anei ve lo, cu mi lai ah
ahmaisabik ih mipi hruaitu cu Pathian asi ih a hril mi minung pawl hmang in mipi a hruai ttheu.
Curuangah hruaitu si ding ih Pathian kawhnak hi a thupi tuk ruangah kawhhran damnak le
tthansonak dingah kawhmi ka si maw silo ti hi fiangte thei thiam awk nak nei hi a thupi tuk
3. Hruaitu cu Siahhlawh asi.
a. Hruaitu cu Tuukhal asi vekin bawi, Boss, le renmi an si dah lo, sal, hnattuantu, le
riantu sawn an si (Matt. 20:28)
b. Hruaitu ttha cun a hruaimi pawl lam in rian, zoh ttha le tuamhlawm beise ai ah
ziangtin so mi ka rian, ka bawm ih ka tuamhlawm thei ding ti lam sawn a ngaituah
ding (Matt. 20:26).
c. Hruaitu ttha cun a hruaimi pawl ih tthanak le lungawinak ngai thupi ih Jesuh Khrih
vekin ahruaimi Tuu pawl hrangah thazang, Fimthiamnak, can le nunnak uilo in a pek
awk ding (Matt. 26:42).
d. Hruaitu ttha cun amah hnakih ttha le amah tluk hruaitu ttha a sersuah ttheu ih a
lungawinak bik cu a hruaimi pawl tthanso le pitlingnak ah asi (1Thess. 1:3-4).
e. Hruaitu ttha cun a hruaimi pawl hrang ih thilttha tuah cu a leiba tluk ah a ruat (Rom.
1:14).
f. Hruaitu ttha cun khawruahnak thianghlim nei in a hruaimi pawl zawnruah lainatnak a
nei (Matt. 15:32; Phil. 2:5).
g. Hruaitu ttha cun a hruaimi pawl in ka thu in ngai hai seh ti a duh vekin a hruaimi pawl
ih thungai khal har a ti lo, a hruaimi pawl kha a namnawi mai dah lo (2King. 5: 13-).
h. Hruaitu ttha cun thuneihnak a ham thluh mai dah lo ih midang hrang zalennak lamzin
sial sak in tangdornak nun thawn mipi a rian (1Pet. 5:6; Jn. 13:1).
i. Hruaitu ttha cun leitlunmi pawl vekin dinhmun sang zet ah ret awk lo in tuukhal in a
tuu pawl lakah a tlan fekfek vekin a hruaimi pawl dinhmun ah ret aw in an harsatnak
pawl a theithiam sak (Jn. 1:14 Jesuh Khrih).
j. Hruaitu ttha asinak cu kawhhran member mipi parah hmuh theih in alang ih kawhhran
nungdam, kawhhran ttha asinak cu kawhhran engkawltu an Pastor zoh, tuamhlawm
le engkawlnak parah a lang ve thung (Gal. 6:2; Col. 3:13-14; Rom. 12:9-10).

THUSIMTU IH THEIH TTUL MI
01.Kan Thulu le kan Bible lak mi a kaihawk ding.
02.Thusim tumkhat ah tummi tampi nei in duhham tuk lo ding
03.Pathian thu kha a ra khawm tu mipi in theih fiang ol thei bik in sim thei a zuam ding ih a
thu cu mipi cawm tu asi tengteng ding.
04.Cangvaih dan luarkai tuk in cangvaih lo ding.
05.Mipi lakah a theihfiang sawn tu tla an um thei ruangah theifiang cuca lo mi kha a cekci le
mai hmuhton mi vekin rel lo ding.
06.Pathian thu ai ah Mi huatnak, thinheng hrikthlaknak thu le mah le innsang nupi fanau
tthatnak thu pulpit parin rel lo ding.
07.Sin le fen zoh mawi ten hruk thiam ding
08.Pulpit ah thuphahcawi in tlinglonak, ralring lonak le mai can silo thu pawl sim lo ding
09.Porhawknak, hngalnak, tluangkhawngnak ttongkam pawl hmang lo ding
10.Pulpit zah lo tuk ih zahmawh thu, zu le sa thu, hnihsuah capoh thu rel uar lo ding
11.Tawpnak tuah tikah a beidong ding zawng siatlam (negative) thu, in silo in ruahsannak le
thinnuamnak ding lam tthatlam (positive) le angaitu forhnak le thapeknak in tawp ter ding

PATHIAN BIAK KHAWMHRUAI TIKAH PASTOR LE HRUAITU PAWL IN THEIH TTUL MI
01.Tikcu tlai lo ten biakinn thleng thei zuam ding
02.Sin le fen cerawk dan mawitawk te hruk ding
03.Baibal siar ding mi bung cang baihat ding
04.Program asang sang te baihat ding
05.Thu tampi sim in ttong tam lo ding, ahleice in hmaisabik ding can ah
06.Khawm lai ah sin in itthat lo ding mual apho tlun ah mipi lung a uih ter
07.Thu le hla kaihawk mi hril thiam zuam ding
08.Mithmai pang ten, mitmen hoiher dan mawi te um thiam zuam ding.

HRUAITU IH SI DAAN DING
01.Thil suangtuah le tawlrel a thiam ding
02.Raltthat zet, teima zet, tumruh zet in ttuan suak tu asi ding
03.Midang dinhmun theithiam sak tu asi ding
04.Thubuai daiter hna thiam tu asi ding
05.Kawhhran hrangah a thazang, a fimthiamnak, le a nunnak tiang a pek siang tu asi ding
06.Soisel le mi nautat hmang loin mi lawm thiam tu asi ding
07.Thureltu lawng silo in rel vekin ttuansuak tu asi ding
08.Beidong ol tu silo in thinsau, teima, tlawmngai thei tu asi ding
09.Thleidannak nei lo mai thu lawng duh lo tu asi ding
10.Daithlang le zangzel ih hnihsuah capoh uar tuk lo ding

MEETING CAAN AH TUAH DING MI LE AGENDA SUAIDAN
01.Agenda cu OB in minute hlun zoh kir in a tuah ding or Chairman, Secretary le Pastor in
an tuah ding ih secretary in zarh khat hlankhan in group viber ah a thlah cia ding ih mipi
le ttuanpi lam in thawh thei ve nak sangka ong sak asi ding ih emergency lutuk lo mi cu
atikcu ah agenda thar pom asi nawn lo ding.
02.Secretary in Meeting kaitu pawl hmin ngankhumnak le signthuhnak a tuah ding (meeting
picang deuh asi le hmin pek cia vekin hmin kawhnak tuah asi ttheu)
03.Pastor lo le Chairman in Baibal siar, thutawi sim le forhfialnak a nei ding ih thlacamnak
thawn thawh asi ding
04.Secretary in Minutes hlun siar nak a nei ding
05.Ttuan zo, ttuan hrih lo, ruahsal ding mi pawl relkhawmnak nei asi ding
06.Kawhhran sung hnattuantu (EC, Departments le Sub-Committee) pawl an hnattuannak
report ding a um le reportnak nei asi ding.
07.Meeting thurelnak sungah lut
08.A ttul dan zirin next meeting tikcu can bikkhiahnak tuah ding
09.Lungawi thusim le thlacamnak thawn meeting khar ding

KAWHHRAN HRUAITU LE MEETING DAN
01.Meeting thawh hlan thleng ding ih a ttheh tiang um ding, ttheh hlan suak ttul thupoimawh
a um asile meeting hruaitu hnen thate sim hnu lawng ah suah ding
02.Thu rel duh mi a um asile upatnak thawn Chairman/Chairperson/leader/
Superintendent/Director tiah dilnak tuah ih siangnak a um lawng ah ding in thu rel ding
03.Thurel can ah duhdawtnak thinlung thawn tawi famkim in rel thei zuam ding, thu pakhat
ah mi pakhat in vei (2) bak ding lo ding
04.Meeting sungah mi thurel le thu umdan thaten ngai ih thu feh dan theithiam zuam ding
05.Mai duh dan vekin thu a feh lo khal le thinheng lo ding, midang ruahnak ziang siar lo in
um lo ding. Thu ttha le awka nem in sim thei zuam ding
06.Meeting kaitu hmuahhmuah in an ruahnak an rel thei ve ti kha theihngilh lo ding
07.Thu pakhat rel lai ah thu dang ah kaat lo ding in ralring ding
08.Mi pakhat khat thurel lai ah ttong ruri lo ding
09.Meeting can ah thu ttha suahpi zuam ding, thu sia hrimhrim suah ter lo ding,
10.Meeting can ah theitawk suah in thurel ve ding ttheh hnuah ttong tam lo kaacip ding
11.Thubur duh can ah ding in bur ih lungkim pi tikah to a ttha
12.Thubur le thu rel duh mi kha kaa in na rel thiam lo asile ca in Chairman hnen na sim thei
13.Famkim lo tlaksamnak nei minung kan si vekin ziangtik lai khalah sual palh thei ka si ti
theiawknak thawn meeting can ah thinheng le thintawi hrimhrim lo ding
14.Mi thurel na ttawmpi asile ding in rel tum aw nawn hlah, to hmun in ka ttawmpi ti mai aw
15.Mi tam sawn lungkimnak kha upatnak thawn cohlan thei zuam ding
16.Thupi pa deuh thu rel can ah Pastor, Advisor le palai pawl thurel can pek ding
17.Minung thawn meeting tuah sihmansehla Pathian in telpi ve ti ziangtik lai khal ah
theihngilh lo ding
18.Meeting can ah pastor hi zalengtak in thurel thei nak sangka ong sak ding: ziangahtile:
Pastor cu Innsang ah pa bik, Company ah Boss, Club ah Nipiah, tlawng inn ah tlawng
sayakyi le Ramkher ah prime minister le president pawl vekin Pathian in kawhhran
hruaitu ding ah hriahthik mi an si ruangah

CHAIRMAN/CHAIRPERSON/LEADER/SUPERINTENDENT/DIRECTOR HNATTUAN
01.Baibal Siar le Thlacamnak thawn Meeting mawite thawh thei zuam ding, tluang le fel te
ttheh thei zuam ding
02.Kaa in siseh, mit in siseh, duhnak alang ter lo ding ih a tam sawn lungkimnak kha felfai
ten thutluknak tuah thei a zuam ding.
03.A duhnak langter in rel ve a duh asile vice chairman hnenah ttuanvo a pek ta hnu lawng
ah a rel thei ve ding, cun rel lai mi thu a cem hlan lo a tokham a luah sal thei lo
04.Vote/mee abangaw pang asile thutluknak a tuah thei
05.Thufeh dan a sual pang asile thu hram ah a kirsal ding, thu abuai pang asile kha mi
agenda kha next meeting ah rel ding in a tuah thei
06.Tihnung mithmai silo in dainak mithmai neih thei a zuam ding
07.Hleidannak umlo ten mi mithmai zoh thiam le mipi thinlung theithiam a zuam ding
08.Thupi le thute, kom ttha le tthalo tthen thiam a zuam ding
09.Meeting kaitu pawl lungthawh ter a zuam ding ih thinheng le thintawi a hmang lo ding
10.Agenda thu rel hlanah a thawhtu kha simfiang ding in a sawm ding
11.Amai thei lo in meeting sawm a theih lo ih a mai thu lawng in meeting a sawm thei lo
12.Meeting kaitu mi pum zat a thei ding
13.Meeting can ah zah kai mi hnipuan a hruk ding
14.Meeting minute tangah hmin khen in a sign ringring ding

SECRETARY HNATTUAN
Kawhhran sung ah Secretary hnattuan hi a thupi tuk asan cu kawhhran pi, Departments
le Sub-committee tiang an hnattuan fel le fello, kawhhran a pitlin maw pitling lo ti cu Secretary
parah a tthum aw
01.Ca lut ca suah tthaten a kilkhawi ding, meeting tinten minute felten a ngankhum ding,
mipi hnen report, thuthan le meeting thurel cat mi ttuan suak ding a mai kut ah a um
02.Chairman theipinak in meeting sawmtu asi ih a sawm tikah ahmun, ani thla, atikcu, felfai
ten a ngan tel ding
03.Dan le dun ttha ten theifiang a zuam ding ih a ttul can kipah simfiang thei tu asi ding
04.Thurel mi tlamtling ter tu asi bangtuk in rel mi vekin ttuan zo le ttuan hrih lo a zoh fel
ringring ding.
05.Kawhhran sung thil um dan thil feh dan le sumpai hmang dan thu neuhneuh tiang theih a
zuam ding ih attul dan zir in EC le mipi hnen theihternak a tuah ding.

EC/DEACON LE HRUAITU DANGDANG LE AN HNATTUAN
01.Biakinn khawmnak ah a ra mi mipi hmuaktu le attul dan zir in tonak rem le petu an si
02.Khawm can ah thilpek thawhlawm, tthenhra tthenkhat a lak ding ih ttha ten a siar hnu
treasurer hnenah an ap ding
03.Bawipa zanriah le baptisma um can ah pastor bawmtu le ttheh tikah thiangfaitu an si
04.Mah leh veng cio ah damlo bawm ttul an um asile pastor hnenah theihtertu an si
05.Thuthang ttha karhzai theinak ding an hna ah ngai in an tawlrel ding
06.Kawhhran sung hruaikaiawk dan a tthanso theinak ding lamzin phunphun an hawl ding
07.Biakinn thleng thei lo pawl thleng thei dan ding hawl in thlen ter thei an zuam ding
08.Kawhhran thawn a pehparaw mi meeting pelhlo ten an kai ding
09.Kawhhran um tu dan Church Pastor hnen an sim ding ih ti dan ding ruahnak an pek ding
10.Veng sung khawmnak, khawhar le lungawi thlacamnak program ti bang pawl ah khawm
an hruai ding
11.Sinfen mawitawk hruk ih mipi hmai ah to in hruaitu lungput le sinak langter ih can
hmangtu remcang lo nak kip ah aiawk ding thei ding in ready in a um ringring ding
12.Mipi thleng hlan ah biakinn thleng thei a zuam ding ih mipi tlun hnu ah a tlung ding